Job 6

Hotuba Ya Pili Ya Ayubu

Ayubu Anajibu: Malalamiko Yangu Ni Ya Haki

1Kisha Ayubu akajibu:
2 ^a“Laiti uchungu wangu ungeweza kupimwa,
nayo taabu yangu yote ingewekwa kwenye mizani!

3 ^bKwa kuwa hakika ingekuwa nzito kuliko mchanga wa bahari zote,
kwa hiyo si ajabu maneno yangu yamekuwa ya haraka.

4 ^cMishale ya Mwenyezi iko ndani yangu,
roho yangu inakunywa sumu yake;
vitisho vya Mungu vimejipanga dhidi yangu.

5 ^dJe, punda-mwitu hulia akiwa na majani,
au ng’ombe dume hulia akiwa na chakula?

6 ^eJe, chakula kisicho na ladha huliwa bila chumvi,
au upo utamu katika ute mweupe wa yai?

7 ^fNinakataa kuvigusa;
vyakula vya aina hii hunichukiza.

8 “Laiti ningepata haja yangu,
kwamba Mungu angenijalia hilo nililotarajia,

9 ^gkwamba Mungu angekuwa radhi kuniponda,
kuuachia mkono wake na kunikatilia mbali!

10 ^hNdipo bado ningekuwa na hii faraja,
furaha yangu katika maumivu makali:
kwamba sikuwa nimeyakana maneno yake yeye Aliye Mtakatifu.

11 ⁱ“Ninazo nguvu gani, hata niendelee kutumaini?
Matazamio yangu ya mbele ni nini, hata niendelee kuwa mvumilivu?

12 ^jJe, mimi nina nguvu za jiwe?
Je, mwili wangu ni shaba?

13 ^kJe, ninao uwezo wowote wa kujisaidia mimi mwenyewe,
wakati ambapo mafanikio yamefukuziwa mbali nami?

14 ^l“Mtu anayekata tamaa angetazamia moyo wa kujitoa wa rafiki zake,
hata kama akiacha uchaji wa Mwenyezi.

15 ^mLakini ndugu zangu sio wa kutegemewa,
ni kama vijito vya msimu,
ni kama vijito ambavyo hufurika

16 ⁿwakati vimefunikwa barafu iyeyukayo,
ambavyo hujazwa na theluji inayoyeyuka,

17 ^olakini hukauka majira ya ukame,
na wakati wa hari hutoweka katika mikondo yake.

18 Misafara hugeuka kutoka njia zake;
hukwea kwenda kwenye nchi ya ukiwa na kuangamia.

19 ^pMisafara ya Tema inatafuta maji,
wafanyabiashara wa Sheba wanaosafiri
hutazama kwa matarajio.

20 ^qWamedhikika, kwa sababu walikuwa na matumaini;
wanafika huko, lakini wanahuzunika kwa kukosa walichotarajia.

21 ^rSasa nanyi mmethibitika kwamba hamna msaada wowote;
mnaona jambo la kutisha, nanyi mnaogopa.

22 ^sJe, nimewahi kusema, ‘Toeni kitu kwa ajili yangu,
au mnilipie fidia kutoka mali zenu,

23 ^tau niokoeni mikononi mwa adui,
au nikomboeni kutoka makucha ya wasio na huruma’?

24 ^u“Nifundisheni, nami nitanyamaza kimya;
nionyesheni nilikokosea.

25 ^vTazama yalivyo ya kuumiza maneno ya kweli!
Lakini mabishano yenu yanathibitisha nini?

26 ^wJe, mna maana ya kuyasahihisha ninayosema,
na kuyafanya maneno ya mtu anayekata tamaa kama upepo?

27 ^xMngeweza hata kupiga kura kwa ajili ya yatima,
na kubadilishana rafiki yenu na mali.

28 ^y“Lakini sasa kuweni na huruma mkaniangalie mimi.
Je, ningeweza kusema uongo mbele zenu?

29 ^zTulizeni hasira, msiwe wadhalimu;
angalieni tena, kwa maana nimehatarisha uadilifu wangu. ▼

▼ Au: haki yangu bado inasimama.

30 ^abJe, pana uovu wowote midomoni mwangu?
Je, kinywa changu hakiwezi kupambanua hila?